Phile | ENQ | STEP |

a1Ap 16:1; Ep 3:1

b2Lo 16:5; Kl 4:17; 2 Ti 2:3

c3Ga 1:3

d4Lo 1:8-9; Ep 1:15-16; Kl 1:13

e6Pl 1:9-11; Kl 1:9-11

f72 Ko 7:4; 2 Jo 4-6

g9Ep 3:1, 4:1; Kl 4:18

h101 Ko 4:15-16; Ga 4:19; Kl 4:9; 1 Te 2:11; Pm 1

j13Pl 2:30

k142 Ko 9:7; 1 Pi 5:2

l16Ep 6:5-9; Kl 3:22—4:1; 1 Ti 6:2

m18Ta 2:10

n191 Ko 16:21; Ga 6:11; Kl 4:18

o22Pl 1:25, 2:24; Ip 13:19

p23Kl 1:7, 4:12

q24Ap 12:12,25, 13:13, 15:37-39, 19:29, 27:2; Kl 4:10,14; 2 Ti 4:10-11

POLOME AKALI PILIMONENYA PEPA PYAO PYASAKAMAIYAMO DOKO

Pii atupa wambao kandapenge

Pilimone doko baa akali kenge singi mende baa sosanya konda petala Kolosi yuu dokonya kateamopa baanya kendemane Onisimasa lenge doko paka pea-pyaa. Dopa petala Onisimasa dokome Polo anjetae andaka paleamo kandatala baa Kitisene jia-pyaa. Dokopa Polome pepa dake pyapala Onisimasame minao Pilimone kateasa pilyina lea-pyaa. Polome lao pituu, Pilimone embame Onisimasa imbu nakaenya baa embanya kendemaneaka doko, Kitisene kaiminingina lao lanyepe lea-pyaa.

Polome Pilimonenya pepa pyao pyasakamaiyamo dokonya pii lyaa dupa:

1—3 Pii Wambao pepanya piamo dupa4—7 Polome Pilimone tama piamo doko8—22 Polome Onisimasa nisoo Pilimone pii lamaiyamo doko23—25 Polome pii etao lasa leamo dupa

Philemon

1 Namba ^{a
,} ^b Polo Kataisa Jisasanya kalai pyakamaingi dokonya anjetae akali dokopa, dee naimanya kaiminingi Timotipa nalimbame pepa dake nalimbanya mona setenge kalai mendai pingi Pilimone embapi, naimanya pimalenge Apiapi, naima-pipa yanda awapa pingi Akipasapi, dee embanya andaka kambu pingi sosa dokopi nyakamanya pyao peekelyambano.

3 Naimanya ^c Takange Gotepa Kamongo Jisasa Kataisapame nyakama kandao mona epe mende palyetala nyakamanya mona doko lyuu lasekena.

Pilimonenya masoo miningipa auu kaengepa dolaponya Polome leamo doko

4 Nambame ^d loma soo pituu, Pilimone emba lao masilyoli pyoo nambanya Gote doko lao yaka pilino lenge. 5 Doko, embame Kamongo Jisasa lao masoo minao katao, Gotenya endakali dupa pitaka auu kayao kalyeno lapae nambame singi. 6 Embame ^e naima-pipa awapa masoo miningi dokome Kataisame epe naima dingi dupa pitaka masokondape pyaale lao nambame loma singi. 7 Kini ^f kaimia, embame Gotenya endakali dupa auu kayapala mona epe palisiino dokonya namba mona etete yaepao nambanya mona doko lyuu lenge.

Polome Pilimone kandao Onisimasa kaiminingina lao dee lanyepengena leamo doko

8 Dopana, ^{g
,} ^h namba Kataisa-kisa katao mende masala nayao embame pipenge doko pipina langipuliaka doko, auu kaenge mana doko lao masetala andiki pyoo langilyo. Namba Polo akali angi doko Kataisa Jisasanya kalai pyakamaipusa indupa anjetae katao, embame nambanya wane Onisimasa ^{▼▼a onisimasaKenge Onisimasa dokonya tenge doko nisingi lapenge.} kandao mona epe mende palyepe lao andiki pyoo langilyo. Namba anjetae katao Wai Pii Epe doko mana lamaipu dokome baa nambanya wane jetelyamo. 11 Wamba baame emba yakinatala nisala nayamoaka doko, indupa baame embapa nambapa lapota nisepenge joo kalyamo.

12 Indupa baa nambanya mona itange doko dee emba katapisa pilyoo epena lelyo. 13 Nambame ^{j
,} ^k Wai Pii Epe doko lamaingi dokonya namba anjetae katao pituu, Onisimasame emba alo pyoo namba nisina yakinala nayapuli lao masilyoaka doko, embame yakana nalate mende nambame napipuli lao masilyo. Emba tangeme mana epe masilino doko watao minatale, nambame emba tuu lanya palyala nayatoo lao masilyo.

15 Baame emba yakinatala gii kukiliaka katea. Dopa piamo doko embame baa dee lanyetenopa baa embapa etete katatambi lao pia julumu. 16 Doko, ^l indupa baa mee kendemaneaka joo nakalyamo. Baa nalimbanya kaiminingi mona setenge mende kalyamo. Nambame baa etete auu kaenge. Dopa pingiaka doko, embame baa embanya endakali yangopi Kamongo lao masoo miningi kaiminingipina lao masetala eteteaka auumi kumate.

17 Dopana, embame nalimba lau tengena lao maseteno kandao doko, embame namba lanyipili pyoo Onisimasa baa dee lanyepe. 18 Baame ^m mendita mendenya emba koyasowapi yanu mende baa-kisa sowapi pia kandeno doko, baanya kenge aloo petala dokonya nambanya kenge setape. 19 Pii ⁿ alapo namba Polo tangeme pepa pyekelyo: nambameaka yanu dupa tolaseto. Embame namba-kisa lete etete katenge nyiino doko nambanya yanu andake emba-kisa silyamo. Dopaka doko, dokonya nambame nalatoo. 20 Kini kaimia, embame Kamongo doko lao masetala dii mendapua manjakapili lao masilyo. Nalimba Kataisanya akali joo kalyambano dokonya embame nambanya mona auu pisakape.

21 Embame nambanya pii doko watao minalapenona lao masetala, pepa dake pyekelyo. Embame tenda mana minateno dokome indupa mana minape lelyo datupa ita minao minatena lao masilyo. 22 Dee ^o pii mende apata lelyo. Nyakamanya loma sipimino dupa Goteme sepala, namba nyakama dee ditana lao masilyona, embame nambanya palipenge panda mende depa lakape.

Pii etao lasa leamo doko

23 Kataisa ^p Jisasanya kalai pyakamaingi dokonya nambapa awapa anjetae katapumu akali Ipapotasa dokome emba kandao auu pyoo katape lelyamo. 24 Dee ^q namba-pipa kalai mendai pingi akali Makepi, Atitakasapi, Dimasapi, Lukupi, dutupame emba kandao auu pyoo katape lelyaminoaka.

25 Kamongo Jisasa Kataisame nyakama kandao mona epe palyoo nyakamanya mona andaka katena.